An Dr Lorraine Nolan — Stiúrthóir Feidhmiúcháin, Gníomhaireacht Drugaí an Aontais Eorpaigh (EUDA)
Próifíl
Chuaigh an Dr Lorraine Nolan (Éire) i mbun an phoist mar Stiúrthóir Feidhmiúcháin ar Ghníomhaireacht Drugaí an Aontais Eorpaigh (EUDA) an 1 Eanáir 2026, tar éis don Bhord Bainistíochta í a cheapadh i mí an Mheithimh 2025 go ceann téarma cúig bliana.
Tá breis agus 25 bliain de thaithí shinsearach ceannaireachta ag an Dr Nolan, lena n-áirítear 10 mbliana mar Phríomhfheidhmeannach ar Údarás Rialála Táirgí Sláinte na hÉireann (HPRA) ó 2016 go 2025. Cuimsíonn a gairmréim eolaíocht, seirbhís phoiblí, claochlú eagraíochtúil agus ceannaireacht feidhmiúcháin ar an leibhéal náisiúnta, ar an leibhéal Eorpach agus ar an leibhéal idirnáisiúnta.
Tá an Dr Nolan, ceannaire a bhfuil an-taithí aici, tar éis foirne ildisciplíneacha a stiúradh agus a chumhachtú, rinne sí maoirseacht ar athrú casta eagraíochtúil agus rinne sí cláir chlaochlaithe straitéiseacha, dhigiteacha agus oibríochtúla a sheachadadh. Tá cuntas teiste láidir aici maidir le bainistiú acmhainní, feidhmíocht airgeadais agus rialachas corparáideach agus aithnítear í as cultúir dhearfacha oibre agus timpeallachtaí ardfheidhmíochta a chothú.
Tá an Dr Nolan ar thús cadhnaíochta freisin sa chomhar rialála Eorpach agus idirnáisiúnta maidir le cógais agus feistí leighis. Bhí sí ina Cathaoirleach ar Bhord Bainistíochta na Gníomhaireachta Leigheasra Eorpaí (EMA) agus d’oibrigh sí go dlúth le raon leathan institiúidí den Aontas, líonraí rialála agus comhpháirtithe domhanda. Le linn a gairme, bhí sí ina príomhchomhairleoir d’Aireacht Sláinte na hÉireann maidir le forbairt beartais rialála agus drugaí agus choinnigh sí rannpháirtíocht fhairsing ar bun leis an rialtas, le gairmithe cúraim sláinte, leis an tsochaí shibhialta agus le páirtithe leasmhara tionscail.
Ó thaobh na heolaíochta de, is saineola í an Dr Nolan ar mheastóireacht agus rialáil cógas agus drugaí, ag baint leasa as 25 bliain de thaithí i róil rialála, theicniúla, bheartais agus bhainistíochta. Sula ndeachaigh sí isteach in HPRA, d’oibrigh sí mar fóiréinseolaí ag Roinn Dlí agus Cirt na hÉireann (1998–2001), ag déanamh próifíliú fóiréinseach ar dhrugaí aindleathacha agus ag comhoibriú go dlúth le forfheidhmiú an dlí náisiúnta.
Tá PhD ag an Dr Nolan sa Cheimic Chógaisíochta ó Choláiste na Tríonóide, Baile Átha Cliath.
Ina ról mar Stiúrthóir Feidhmiúcháin ar EUDA, tugann an Dr Nolan meascán cumhachtach léi de shaineolas eolaíoch, fís straitéiseach, ceannaireacht eagraíochtúil agus taithí idirnáisiúnta, rud a chuireann ar chumas na gníomhaireachta ullmhacht, freagairt agus athléimneacht na hEorpa a neartú i bhfianaise feiniméan drugaí atá ag teacht chun cinn agus atá casta.
Agus í ag glacadh leis an bpost, dúirt an Dr Nolan: ‘Is mór an onóir é ceannaireacht EUDA a ghlacadh ag an gcéim spreagúil seo dá fhorbairt. Táim ag tnúth le treoir a thabhairt don ghníomhaireacht chun acmhainn na hEorpa a neartú chun dúshláin drugaí atá ag teacht chun cinn a réamh-mheas agus freagairt go héifeachtach dóibh, agus ag an am céanna an nuálaíocht agus an claochlú eagraíochtúil a spreagadh. Trí chomhoibriú a chur chun cinn ar fud comhpháirtithe agus pobail náisiúnta, Eorpacha agus idirnáisiúnta, is féidir linn athléimneacht agus ullmhacht a fheabhsú agus tacú le sochaithe níos sláintiúla agus níos sábháilte. Tá stair fhada sármhaitheasa eolaíochta ag an ngníomhaireacht. Tá an-bhród orm a bheith páirteach i bhfoireann chomh tiomanta sin tráth a bhfuil tábhacht níos mó ná riamh ag baint le fíricí láidre agus le cinnteoireacht atá bunaithe ar fhianaise.’
Príomhphointí
Ionadaíocht Eorpach
- Cathaoirleach, Bord Bainistíochta na Gníomhaireachta Leigheasra Eorpaí (EMA)
- Comhalta, Líonra na gCeann Gníomhaireachtaí Leigheasra (HMA)
- Comhalta, Líonra na nÚdarás Inniúil – Feistí Leighis
- Comhalta, Croíghrúpa HMA maidir le Feistí Leighis
- Comhalta, Grúpa Stiúrtha ACT an Aontais um Thrialacha Cliniciúla
- Comhalta, Grúpa Stiúrtha Feidhmiúcháin um Ghanntanais agus um Shábháilteacht Táirgí Leighis (MSSG)
- Comhalta, Grúpa Comhairleach Phunann an Líonra Leigheasra Eorpaigh
- Meantóir HMA, Meitheal na hOifige Forfheidhmithe
Oideachas
1987: Céim sa Cheimic, Coláiste na Tríonóide, Baile Átha Cliath.
1995: PhD sa Cheimic Chógaisíochta, Coláiste na Tríonóide, Baile Átha Cliath.
Teangacha
Cainteoir dúchais Béarla, Gaeilge shásúil, Fraincis bhunúsach.
Nótaí do na heagarthóirí
Airteagal 29 den Rialachán EUDA: Is é Stiúrthóir Feidhmiúcháin EUDA ionadaí dlíthiúil na gníomhaireachta agus tá sí freagrach don Bhord Bainistíochta, príomhchomhlacht cinnteoireachta na gníomhaireachta. Tá an Stiúrthóir Feidhmiúcháin ceaptha le haghaidh tréimhse in-athnuaite cúig bliana agus tá sé/sí freagrach as an ngníomhaireacht a reáchtáil ó lá go lá (cláir oibre, buiséad agus foireann). Tá Bord Bainistíochta EUDA comhdhéanta d’ionadaí amháin ó gach Ballstát an Aontais, beirt ionadaithe ón gCoimisiún Eorpach agus beirt arna n-ainmniú ag Parlaimint na hEorpa.