Ag gníomhú inniu, ag súil leis an lá amárach

Is saincheisteanna domhanda iad úsáid drugaí aindleathacha agus gáinneáil ar dhrugaí, saincheisteanna a chuireann sláinte agus slándáil shaoránaigh an Aontais i mbaol. Tá staid drugaí an lae inniu casta, agus tá substaintí láidre á dtáirgeadh, á ngáinneáil agus á ndíol ar scála nach bhfacthas riamh roimhe seo. Tá ról ríthábhachtach ag Gníomhaireacht Drugaí an Aontais Eorpaigh (EUDA) maidir le freagairt don fheiniméan sin. Cinnteoimid go mbeidh an tAontas réidh agus in ann aghaidh a thabhairt ar na dúshláin a bhaineann le staid na ndrugaí, sa lá atá inniu ann agus amach anseo araon. Cuidíonn ár gcuid oibre le sráideanna na hEorpa a dhéanamh níos sábháilte agus le beatha daoine a shábháil. 

Ónár mbunáit sa Phortaingéil, cabhraímid le hinstitiúidí de chuid an Aontais agus leis na Ballstáit bagairtí a bhaineann le drugaí a réamh-mheas agus freagairt go héifeachtach dóibh. Eisímid foláirimh sláinte agus slándála agus cumarsáid riosca, roinnimid eolas agus molaimid beartais agus gníomhaíochtaí fianaisebhunaithe chun aghaidh a thabhairt go héifeachtúil ar fhadhbanna. Is é ár mana “Ag gníomhú inniu, ag súil leis an lá amárach”.

Fíricí

• Bunaithe go foirmiúil in 2024 in ionad EMCDDA (féach Gníomhaireacht Nua Drugaí an Aontais Eorpaigh ag tosú ag obair le sainordú níos leithne, Preaseisiúint EUDA Uimh. 1/2024)
• An lucht saothair atá ann faoi láthair: 119 (beartaithe go mbeidh an figiúr seo cothrom le 154 in 2027)
• Cuid de líonra ghníomhaireachtaí speisialaithe díláraithe an Aontais
• An Stiúrthóir Feidhmiúcháin: Lorraine Nolan (Éire), ó 2026 i leith
• Cathaoirleach an Bhoird Bainistíochta: Franz Pietsch (an Ostair), ó 2022 i leith
• Cathaoirleach an Choiste Eolaíoch: Marieke Liem (An Ísiltír) (ó 2025 i leith)  

Misean

Is é an misean foriomlán atá againn ullmhacht an Aontais maidir le drugaí a neartú trí cheithre phríomhchatagóir seirbhíse idirnasctha: réamh-mheas, foláireamh, freagairt agus foghlaim.

Réamh-mheas

Táimid ag súil le dúshláin amach anseo a bhaineann le drugaí trí threochtaí atá ag teacht chun cinn agus bagairtí a d’fhéadfadh a bheith ann a shainaithint. Ceadaíonn ár dtacair sonraí chuimsitheacha anailís dhomhain a dhéanamh ar phatrúin fhadtéarmacha, agus soláthraíonn siad modhanna agus uirlisí ceannródaíocha, cosúil le hanailís fuíolluisce, léargas gar d’fhíor-am ar na hathruithe is déanaí. Trí chur leis an anailís a rinneadh ar threochtaí a bhaineann leis an am atá caite agus leis an am i láthair, is fearr a éireoidh linn forbairtí a dhéanfar amach anseo a mheas. Tá an fhadbhreathnaitheacht lárnach inár gcuid oibre, rud a chuireann ar ár gcumas cásanna féideartha a shamhlú agus an fhaisnéis is gá a thabhairt d’institiúidí de chuid an Aontais agus do na Ballstáit chun cinntí réamhbhreathnaitheacha a dhéanamh.

Foláireamh

Tá Córas Luathrabhaidh seanbhunaithe an Aontais maidir le substaintí sícighníomhacha nua fós lárnach chomh fada is a bhaineann le hullmhacht an Aontais maidir le drugaí. Ina theannta sin, éascaíonn ár gCóras Foláirimh Eorpach nua um Dhrugaí mearmhalartú faisnéise nuair a thagann rioscaí tromchúiseacha sláinte, sóisialta, sábháilteachta agus slándála a bhaineann le drugaí chun cinn. Ar an tslí sin, cinntítear go gcuirfear faisnéis ríthábhachtach, atá íogair ó thaobh ama de agus inghníomhaithe ar fáil do pháirtithe leasmhara ábhartha chun tacú le freagairtí fianaisebhunaithe. Ag cur leis sin, cuireann ár gCóras Eorpach um Measúnú ar Bhagairtí Sláinte agus Slándála le cumas an Aontais bagairtí atá ag teacht chun cinn a thuar agus freagairt go héifeachtúil dóibh. I dteannta a chéile, tá ról ríthábhachtach ag na córais sin maidir leis an tsláinte phoiblí agus an tsábháilteacht phoiblí a chosaint ar fud an Aontais.

Freagair

Cabhraímid leis an Aontas agus lena Bhallstáit a bhfreagairtí ar fheiniméan na ndrugaí a neartú agus freagairt thapa a thabhairt ar bhagairtí agus ar fholáirimh a bhaineann le drugaí. Anseo, cuirimid fianaise eolaíoch ar fáil le haghaidh cinnteoireachta, amhail maidir le substaintí sícighníomhacha nua. Lenár n‑uirlisí agus tacaíocht, is féidir le tíortha idirghabhálacha luatha a fhorbairt agus measúnú a dhéanamh ar infhaighteacht agus ar cháilíocht a bhfreagairtí i gcomhréir leis na caighdeáin eolaíocha is déanaí. Cabhraímid leis na Ballstáit coimircí breise a chur chun feidhme chun an díobháil a bhaineann le drugaí a dhéanann difear do shaoránaigh an Aontais a laghdú.

Foghlaim

Éascaímid malartú eolais agus foghlaim ar fud an Aontais chun tacú le beartais agus idirghabhálacha fianaisebhunaithe drugaí. Cuid lárnach dár misean is ea dea-chleachtais a shainaithint agus a shainiú agus idirghabhálacha eolaíochtbhunaithe agus caighdeáin cháilíochta a chur chun cinn i réimsí amhail cosc, cóireáil agus laghdú díobhála. Tacaíonn ár n‑iarrachtaí le tíortha maidir le forbairt acmhainní agus maidir le straitéisí, beartais agus idirghabhálacha náisiúnta a cheapadh agus a mheas. Trí oideachas, oiliúint agus líonraí — amhail líonra na saotharlann fóiréinseach agus tocsaineolaíoch — cuirimid feabhas ar inniúlacht ghairmiúil. Ina theannta sin, cabhraímid leis an gCoimisiún Eorpach agus leis na Ballstáit chun tosaíochtaí taighde a shainiú agus chun cláir thaighde agus nuálaíochta an Aontais a mhúnlú.

Luachanna

Tá baill foirne EUDA tiomanta don Aontas agus dá luachanna foriomlána. Go sonrach, treoraíonn ceithre bhunluach ár gcuid oibre:

• Barrfheabhas eolaíochta – eolas fianaisebhunaithe a chur chun cinn chun bonn taca a chur faoi chinnteoireacht agus taighde fónta.
• Ionracas agus neamhchlaontacht – ag obair go gairmiúil, go hoibiachtúil, go neamhchlaonta, go neamhspleách agus go trédhearcach.
• Díríthe ar an gcustaiméir agus ar an tseirbhís – riachtanais athraitheacha custaiméirí a réamh-mheas agus ábhar tráthúil agus saincheaptha a tháirgeadh chun cabhrú le bagairtí nua a réamh-mheas agus chun glacadh le beartais eolasacha.
• Éifeachtúlacht agus inbhuanaitheacht – tús áite a thabhairt do ghníomhaíochtaí a sholáthraíonn luach, a urramaíonn cost-éifeachtúlacht agus a chuireann inbhuanaitheacht chorparáideach chun cinn.

Pearsantacht

Neamhspleách: Is lárionad tagartha neamhspleách agus uathúil muid maidir le drugaí agus andúil i ndrugaí san Eoraip.

Údarásach: Is foinse iontaofa faisnéise agus anailíse fhianaisebhunaithe muid, a roinnimid lenár gcustaiméirí.

Ildisciplíneach: Páirteach inár bhfoireann ilchultúrtha agus ilteangach tá dochtúirí leighis, eolaithe polaitiúla agus sóisialta, staitisteoirí, saineolaithe dlí, poitigéirí, coireolaithe agus speisialtóirí i gcumarsáid, riarachán, agus teicneolaíocht faisnéise agus cumarsáide.

Nuálaíoch: Trí úsáid a bhaint as cur chuige solúbtha, forbraímid táscairí ceannródaíocha agus modhanna ceannródaíocha chun faireachán a dhéanamh ar shaincheisteanna drugaí atá ag teacht chun cinn agus chun freagairt go tapa dóibh. Trí chomhchruthú lenár gcomhpháirtithe, soláthraímid anailísí cuimsitheacha chun bonn eolais a chur faoi bheartas agus cleachtas drugaí.

Dírithe ar chustaiméirí: Déanaimid teagmháil le raon leathan custaiméirí ar leibhéal áitiúil agus ar leibhéal domhanda. Áirítear orthu sin lucht ceaptha beartas agus cleachtóirí Eorpacha agus náisiúnta atá ag obair i réimse na ndrugaí, acadóirí, taighdeoirí, eagraíochtaí na sochaí sibhialta, daoine a bhfuil tionchar ag fadhbanna drugaí orthu agus a dteaghlaigh, agus an pobal i gcoitinne.

Eorpach: Táimid tiomanta do bhunluachanna an Aontais Eorpaigh: dínit an duine, an tsaoirse, an daonlathas, an comhionannas, an smacht reachta agus cearta an duine. Creidimid i mbeartais drugaí atá bunaithe ar urraim do chearta bunúsacha.

Idirnáisiúnta: Cé go bhfuilimid dírithe go príomha ar an Eoraip, tá ról láidir idirnáisiúnta againn. Tacaímid le hinstitiúidí an Aontais i mbeartas drugaí agus bímid i dteagmháil go gníomhach le tíortha agus le heagraíochtaí i réigiúin eile ar fud an domhain.

Líonra pointí fócasacha náisiúnta EUDA

Is iad na pointí fócasacha náisiúnta (NFPanna) i mBallstáit an Aontais, sa Tuirc agus san Iorua ár bpríomhsholáthraithe sonraí. Le chéile, is ionann iad agus an Líonra Faisnéise Eorpach maidir le Drugaí agus Andúil i nDrugaí (líonra Reitox). Cinntíonn an líonra seo cur chuige cuimsitheach agus comhchuibhithe maidir le tuairisciú ar dhrugaí san Eoraip. Mar dhlúthchuid de struchtúr bainistíochta na gníomhaireachta, cumhachtaítear na NFPanna laistigh dá dtíortha mar ambasadóirí EUDA, rud a chruthaíonn an comhéadan le custaiméirí ar leibhéal náisiúnta.

Comhar idirnáisiúnta

Leis an sainordú láidir idirnáisiúnta atá againn, déanaimid faireachán ar threochtaí domhanda drugaí a d’fhéadfadh a bheith ina mbagairt don Eoraip. Comhoibrímid le tríú tíortha, go háirithe tíortha is iarrthóirí agus tíortha is iarrthóirí ionchasacha ar an Aontas, agus tionlacaimid iad chun faireachlanna náisiúnta drugaí a bhunú agus chun comhchruthú a dhéanamh i réimsí an bhailithe sonraí, an mheasúnaithe ar bhagairtí agus na gcóras luathrabhaidh. Tacaímid leis an Aontas agus lena Bhallstáit le sonraí agus le hanailís ag fóraim iltaobhacha beartais drugaí agus oibrímid i gcomhar le heagraíochtaí idirnáisiúnta chun beartas drugaí domhanda fianaisebhunaithe a fhorbairt. 

Custaiméirí

Thar na blianta, tá an ghníomhaireacht forbartha ó sholáthraí faisnéise den chuid is mó go dtí gníomhaireacht atá dírithe ar bhonn níos réamhghníomhaí ar sheirbhís. Tá na príomhchustaiméirí seo a leanas ag EUDA:

• Institiúidí den Aontas Eorpach
• Cinnteoirí/lucht ceaptha beartas náisiúnta
• Gairmithe atá ag obair i réimse na ndrugaí
• Eolaithe agus taighdeoirí
• Eagraíochtaí na sochaí sibhialta, lena n‑áirítear eagraíochtaí daoine a úsáideann drugaí agus eagraíochtaí pobal a ndéanann tomhaltas agus díol drugaí nó coireacht a bhaineann le drugaí difear dóibh.

Rialachas

Is é an Bord Bainistíochta príomhchomhlacht cinnteoireachta na gníomhaireachta. Tá ionadaí amháin aige ó gach Ballstát, ón Iorua agus ón Tuirc, beirt ón gCoimisiún Eorpach agus beirt saineolaithe neamhspleácha arna roghnú ag Parlaimint na hEorpa. Faigheann sé tacaíocht ó Bhord Feidhmiúcháin agus ó Choiste um Buiséid. Is é Stiúrthóir Feidhmiúcháin EUDA ionadaí dlíthiúil na gníomhaireachta agus tá sé freagrach don Bhord Bainistíochta.

Díríonn an ghníomhaireacht a cuid oibre ar na réimsí ina bhféadfadh sí an breisluach is mó is féidir a chur ar fáil. Comhlíontar rialacha dea-rialachais agus cóid iompair an Aontais, lena n‑áirítear dea-iompraíocht riaracháin agus trédhearcacht, agus cosaint sonraí agus seachaint coinbhleachtaí leasa. Soláthraíonn meastóireachtaí seachtracha rialta seiceáil neamhspleách ar fheidhmíocht na gníomhaireachta.

Buiséad

Braitheann EUDA ar mhaoiniú a chuirtear ar fáil trí bhuiséad ginearálta an Aontais Eorpaigh (líne bhuiséid B3-441). I gcomhair 2024, is é EUR 32 131 775 ranníocaíocht an Aontais. Le ranníocaíochtaí ón Tuirc agus ón Iorua, tá an buiséad iomlán cothrom le EUR 33 653 109. Faightear cistí breise do thionscadail cúnaimh theicniúil. 

Nuálaíocht

Tá an nuálaíocht ríthábhachtach má tá EUDA chun coinneáil suas le hathruithe réabhlóideacha a bhaineann le méid agus le cineál fhadhb na ndrugaí agus leis an domhan ina mairimid. Dá bhrí sin, téann EUDA sa tóir ar réitigh chruthaitheacha, idirdhisciplíneacha agus chomhoibritheacha ar na dúshláin chomhaimseartha atá le sárú. Leathnaigh EUDA a chumas faireacháin trí ghnáthbhailiú sonraí a chomhlánú le faisnéis ó raon méadaitheach foinsí ceannródaíocha, agus soláthraíodh anailísí níos tráthúla agus níos cruinne. I ré ina mbíonn claochlú digiteach ríthábhachtach d’eagraíochtaí chun luach a sholáthar do pháirtithe leasmhara, tá an ghníomhaireacht ag saothrú teicneolaíochtaí nua a úsáid ar mhaithe le barrfheabhsú gnó agus cumarsáid.