Cannabas – an staid reatha san Eoraip (An Tuarascáil Eorpach um Dhrugaí 2025)
Is é cannabas an druga aindleathach is coitianta a úsáidtear san Eoraip fós. Ar an leathanach seo, tá eolas le fáil faoin anailís is déanaí ar an staid drugaí san Eoraip i ndáil le cannabas, lena n-áirítear leitheadúlacht úsáide, éileamh ar chóireáil, urghabhálacha, praghas agus láidreacht, díobhálacha agus tuilleadh.
Is cuid den Tuarascáil Eorpach um Dhrugaí 2025 é an leathanach seo ina gcuirtear i láthair forléargas bliantúil EUDA ar an staid drugaí san Eoraip.
An nuashonrú is déanaí: 5 Meitheamh 2025
Tosaíocht sláinte poiblí is ea tuiscint a fháil ar na himpleachtaí a bhaineann le margadh cannabais na hEorpa ar margadh é a bhíonn de shíor ag athrú
Is é cannabas an druga aindleathach is mó a úsáidtear san Eoraip, agus léirítear i suirbhéanna náisiúnta gur bhfuil cannabas úsáidte ag thart ar 8.4 % d’aosaigh Eorpacha (is é sin, 24 mhilliún daoine idir 15 agus 64 bliana d’aois) le bliain anuas. Is ionann an margadh cannabais agus an sciar is mó den mhargadh miondíola drugaí aindleathacha foriomlán san Aontas, a bhfuil luach measta EUR 12.1 billiún ar a laghad luaite leis. Tá an chuma ar an scéal go bhfuil an leibhéal úsáide agus na treochtaí ó thaobh úsáide de a tuairiscíodh i sonraí náisiúnta le déanaí ilchineálach (féach Leitheadúlacht agus patrúin úsáide cannabais, thíos), ámh, agus tá forbairtí suntasacha fós á dtabhairt faoi deara sa mhargadh céanna. Sa chomhthéacs sin, tá díospóireacht fós ar siúl maidir leis an mbealach is fearr chun freagairt d’úsáid an druga seo, agus tá roinnt tíortha i mbun cur chuige rialála ina leith a mhodhnú. Tríd is tríd, tá géarghá ann teacht ar thuiscint níos fearr ar na díobhálacha féideartha a bhaineann le patrúin éagsúla úsáide cannabais agus ar na himpleachtaí a bhíonn aige sin maidir le beartas agus cleachtas.
Tá fianaise níos fearr ar éifeachtúlacht ag teastáil le haghaidh cóireálacha atá i mbun a bhforbartha d’fhadhbanna cannabais
Meastar gur úsáideoirí cannabais laethúla nó beagnach laethúil iad thart ar 1.5 % d’aosaigh san Aontas (4.3 milliún daoine), agus is é is dóichí go mbeidh fadhbanna ag na daoine sin a bhaineann le húsáid an druga sin. D’fhéadfadh úsáid cannabais raon fadhbanna sláinte fisiciúla agus fadhbanna meabhairshláinte a chruthú nó a ghéarú, lena n-áirítear siomptóim riospráide ainsealacha, spleáchas ar channabas agus siomptóim shíocóiseacha. Ina theannta sin, fuarthas amach i staidéar a rinneadh go bhféadfadh baint a bheith ag úsáid rialta channabais le gnóthachtáil oideachais ní ba mheasa agus le riosca méadaithe go mbeadh an t-úsáideoir páirteach sa chóras ceartais choiriúil. Is iad na fadhbanna is mó a bhaineann le tosú luath úsáide, táirgí ardnirt agus patrúin úsáide níos rialta agus níos fadtéarmaí.
Is gá tuiscint níos fearr a bheith ann ar na fadhbanna a bhíonn ag daoine a úsáideann cannabas, agus ar chonairí atreoraithe iomchuí agus ar roghanna cóireála éifeachtacha. Tuairiscítear go bhfuil cannabas freagrach as níos mó ná aon trian den ospidéalú ar fad de dheasca cóireáil drugaí san Eoraip, agus méadaíonn an cion seo go dtí os cionn dhá chúigiú nuair a chuirtear san áireamh iad siúd atá i mbun dul faoi chóireáil den chéad uair. Is gnách go mbíonn daoine a fhaigheann cóireáil le haghaidh cannabais beagán níos sine anois ná mar a bhí roimhe seo, agus go dtógann sé tréimhse níos faide chun rochtain a fháil ar chóireáil tar éis dóibh tosú an druga a úsáid. Tá sé deacair na torthaí sin a léirmhíniú, i bpáirt mar gheall ar an raon leathan idirghabhálacha a chuirtear ar fáil d’úsáideoirí cannabais, a bhféadfadh gearr-idirghabhálacha nó atreoruithe treorach ón gcóras ceartais choiriúil a bheith san áireamh leo. Tá idirghabhálacha spriocdhírithe ar líne do dhaoine a úsáideann cannabas, nó idirghabhálacha digiteacha níos ginearálta do dhéagóirí a bhaineann triail as drugaí aindleathach ar bith, ar fáil i roinnt Ballstát den Aontas. Cé go bhféadfadh sé a bheith furasta rochtain a fháil orthu, go minic cuirtear na seirbhísí sin ar fáil lasmuigh de chórais sheanbhunaithe chóireála, agus d’fhéadfaí glacadh leo mar an chéad phointe teagmhála dóibh siúd a bhfuil cabhair á lorg acu. Faoi láthair, is ionann córais ceartais choiriúil agus cúraim sláinte i mBallstáit den Aontas agus thart ar an gceathrú cuid d’atreoruithe cóireála cannabais. Téann an sciar is mó de chliaint cóireála cannabais (45 % in 2023) faoi chóireáil ar a dtionscnamh féin.
I staidéar a rinneadh le déanaí ar infhaighteacht cóireálacha sonracha d’fhadhbanna cannabais i dtíortha Eorpacha, tugadh leibhéil mhéadaithe rochtana ar chóireáil faoi deara le deich mbliana anuas. Fuarthas amach sa taighde go bhfuil na cóireálacha sin ar fáil anois i dtuairim is leath de thíortha tuairiscithe EUDA, agus go bhfuil cumhdach na gcóireálacha ar an láthair teoranta i gcónaí laistigh de thíortha. Is iondúil go dtairgtear cóireálacha síceasóisialta, cosúil le teiripe chognaíochta agus iompraíochta agus agallóireacht inspreagtha, agus is iad sin na hidirghabhálacha a bhfuil an méid is mó taighde déanta orthu i ndáil le fadhbanna cannabais. Faoi láthair, níl aon chóireáil chógaseolaíoch ar fáil atá formheasta. Bhí fáil níos forleithne ar idirghabhálacha r-Shláinte (ar líne) le linn phaindéim COVID-19. Áirítear le cuid de na hidirghabhálacha sin comhpháirteanna uathoibrithe, in éineacht le teiripeoirí nó in ionad teagmháil dhíreach le teiripeoirí. Tá an fhianaise maidir le héifeachtacht na gcur chuige sin éagsúil i gcónaí. Mar sin féin, tugtar le fios go bhféadfadh mná ní ba mhó tairbhe a bhaint astu, agus go bhféadfadh éifeacht chóireála ní ba láidre a bheith i gceist le cláir a mbíonn seisiúin chomhtháite le teiripeoir oilte san áireamh iontu.
Baineann castacht le meastóireacht a dhéanamh ar an riosca díobhála sa réimse seo mar gheall ar an raon méadaithe táirgí atá bunaithe ar channabas a d’fhéadfadh a bheith ar fáil d’úsáideoirí, lena n-áirítear iteáin, táirgí ardnirt agus díorthaigh éagsúla.
D’fhéadfadh gáinneáil ar channabas a bheith ag éirí ní b’éagsúla
Ar an iomlán, lean urghabhálacha de tháirgí cannabais de bheith ag feidhmiú ag leibhéil ní b’airde ná riamh in 2023, fianaise ar ard-infhaighteacht an druga seo (féach Sonraí maidir leis an margadh cannabais, thíos). Mar sin féin, tháinig laghdú suntasach ar an gcainníocht iomlán de roisín cannabais a urghabhadh san Aontas in 2022, go príomha mar gheall ar laghdú ar urghabhálacha tuairiscithe ag an Spáinn, sular tugadh méadú beag faoi deara arís in 2023. D’fhéadfaí glacadh leis sin mar fhianaise ar oiriúnú ar bhealaí soláthair i measc na ndaoine a mbíonn baint acu le gáinneáil ar roisín cannabais ón Afraic Thuaidh chun na hEorpa mar fhreagairt ar bhearta ar bhain údaráis forfheidhmithe dlí na Spáinne tairbhe astu. Sa chomhthéacs sin, díol spéise is ea é go bhfuil méadú suntasach tagtha ar líon an channabais luibhe a urghabhadh sa Spáinn ó 2019 i leith. In 2023, bhí an Spáinn freagrach as 68 % den roisín ar fad a urghabhadh, as 30 % den channabas luibhe ar fad a urghabhadh, agus as 73 % den líon iomlán plandaí cannabais a urghabhadh san Aontas. Leagtar béim sna sonraí sin ar an ról suntasach atá ag an Spáinn mar thír idirthurais le haghaidh gáinneáil ar channabas agus mar limistéar táirgthe. Tá sé tábhachtach a thabhairt faoi deara, áfach, go dtarlaíonn táirgeadh cannabais ar mhórscála in áiteanna eile san Aontas freisin, do mhargaí intíre agus idirnáisiúnta araon. Déanann údaráis forfheidhmithe dlí san Eoraip na mílte láithreán beag, meánscála agus tionsclaíoch um shaothrú cannabais a dhíchóimeáil gach bliain. Áirítear ina measc sin láithreáin bheaga agus láithreáin mheánscála, maille le láithreáin ar scála níos tionsclaíche (féach Fíor 2.1 agus Fíor 2.2). Tá ardéilimh ar uisce agus ar fhuinneamh luaite le saothrú aindleathach cannabais. D’éascaigh athruithe rialála maidir le táirgeadh cannabais i roinnt tíortha taighde ar na tionchair chomhshaoil a bhaineann leis, lena n-áirítear a lorg carbóin, creimeadh ithreach agus éifeachtaí ar chúltaiscí uisce.
Tabhair faoi deara: Láithreáin díchóimeáilte ag an bhfórsa póilíneachta náisiúnta, An Garda Síochána.
Tabhair faoi deara: Saoráid díchóimeáilte ag an Guardia Civil i mí Dheireadh Fómhair 2024 mar chuid d’Oibríocht Califa-Blister-23 i gcúige Córdoba.
Gineann margadh mór cannabais na hEorpa brabúis shuntasacha do ghrúpaí coireachta eagraithe a mbíonn baint acu le saothrú, gáinneáil agus dáileadh an druga – rud is cúis le hábhair imní slándála éagsúla do lucht ceaptha beartas na hEorpa. Áirítear leis sin an úsáid a mbaineann líonraí táirgthe agus gáinneála as foréigean, mar a tugadh faoi deara in Margadh Drugaí: Cannabas – Grinnanailís de chuid EUDA agus Europol, agus in Measúnú ar Bhagairt na Coireachta Tromchúisí Eagraithe 2025. Mar shampla, tuairiscíonn roinnt Ballstát den Aontas leibhéil gan fasach d’fhoréigean a bhaineann leis an margadh drugaí, a bhfuil sciar mór de nasctha leis an margadh cannabais, i bpáirt mar gheall ar a éagsúlacht agus a bhrabúsacht. Is éagsúil agus inoiriúnaithe iad na líonraí coiriúla a bhíonn ag feidhmiú sa mhargadh seo; go minic bíonn siad ag gáinneáil ar roinnt cineálacha drugaí iomadúla, agus bíonn baint acu le foréigean, le héilliú agus le mí-úsáid struchtúr dlíthiúil gnó chun a spriocanna a bhaint amach. Fágann sé sin go bhfuil trádáil aindleathach cannabais an-luaineach agus dinimiciúil, rud a chruthaíonn iomaíocht inmheánach idir grúpaí coiriúla a bhíonn mar bhonn le foréigean go minic (féach Margadh Drugaí an Aontais Eorpaigh: Cannabas – Líonraí coiriúla).
D’ainneoin go bhfuil táirgí agus foirmeacha nua den druga seo ar fáil, is iad cannabas luibhe agus roisín cannabais na foirmeacha is coitianta fós. D’ainneoin gur mó na cainníochtaí de roisín cannabais a urghabhadh ná na cainníochtaí de channabas luibhe a urghabhadh, meastar gur fianaise é sin ar leochaileacht níos mó an roisín cannabais do bhearta díchumasaithe i ngáinneáil trasteorann isteach san Aontas. Tá cannabas luibhe fós ar fáil go coitianta i gcuid mhaith tíortha. Is féidir cannabas luibhe a fhás in aice leis an margadh úsáideoirí atá beartaithe dó, agus d’fhéadfadh sé sin riosca a bhraite a laghdú.
Tugadh méadú leanúnach faoi deara ar láidreacht an roisín cannabais a urghabhadh in 2023, agus tá díreach faoi bhun 23 % THC le fáil sa mheánsampla roisín faoi láthair. Tá sé sin an-ard de réir caighdeán stairiúil, rud a d’fhéadfadh a bheith ina chúis le ní ba mhó rioscaí sláinte, go háirithe nuair ó thaobh tosú luath úsáide de. I gcodarsnacht leis sin, is é meán-neart an channabais luibhe a urghabhadh cothrom le thart ar 11 % THC le roinnt blianta anuas.
D’fhéadfadh roinnt forbairtí, ar ábhair imní iad maidir le brath urghabhálacha cannabais a thagann isteach san Eoraip, a léiriú go bhfuil bealaí gáinneála á n‑éagsúlú an t-am ar fad, rud lena gcruthaítear dúshlán níos mó i ndáil le hiarrachtaí díchumasaithe. Ina measc sin tá gáinneáil ar tháirgí cannabais trí chórais phoist agus aerthaisteal tráchtála, atá nasctha le tíortha éagsúla, lena n-áirítear na Stáit Aontaithe, Ceanada agus, go pointe níos lú, an Téalainn (Fíor 2.3).
Tabhair faoi deara: Drugaí urghafa ag an bhfórsa póilíneachta náisiúnta, An Garda Síochána, ag Custaim Aerfort na Sionainne agus ag na Coimisinéirí Ioncaim, Éire, ó phaisinéirí aerlíne tráchtála a bhí ag taisteal ó na Stáit Aontaithe go hÉirinn, Nollaig 2024.
Le beartais channabais tugtar aghaidh ar raon níos leithne ábhar imní sláinte
Tá méadú ag teacht ar éagsúlacht na dtáirgí cannabais atá ar fáil san Eoraip, ar mhargadh na ndrugaí aindleathacha agus ar an margadh earraí tomhaltais araon. Tá táirgí ar fáil ina bhfuil leibhéil ísle THC, nó substaintí eile a d’fhéadfaí a dhíorthú ón bplanda cannabais, amhail CBD, nó an dá rud. Tá spéis mhór tráchtála i dtáirgí CBD i dtáirgí bia agus i bhforbhianna, agus tá an Coimisiún Eorpach tar éis glacadh le 194 iarratas ar údarú táirgí CBD mar bhia núíosach ó 2018 i leith.
Ar mhargadh na ndrugaí aindleathacha, is ábhar imní ar leith é infhaighteacht eastóscán agus iteán ardnirt, agus luaitear é sin i gceangal le cásanna de ghéarthocsaineacht drugaí i rannóga éigeandála ospidéil. Ina theannta sin, is ann ábhair imní go bhféadfadh roinnt táirgí a dhíoltar ar an margadh aindleathach mar channabas a bheith truaillmheasctha le cannaibionóidigh shintéiseacha láidre. Chun tuilleadh eolais a fháil faoi na cannaibionóidigh shintéiseacha sin, féach Substaintí sícighníomhacha nua – an staid reatha san Eoraip.
Braitheadh roinnt cannaibionóideach leathshintéiseach ar an margadh tráchtála in áiteanna san Eoraip le déanaí. Is substaintí iad sin a mheastar a bheith á dtáirgeadh as cannaibidhé-ól a easctósctar as cannabas íseal-THC (cnáib), nach rialaítear cuid de faoi na coinbhinsiúin idirnáisiúnta drugaí i láthair na huaire. Is dócha gurb é an cannaibionóideach leathshintéiseach is coitianta ná heicsi-hidreachannabanól (HHC), ach freisin le déanaí tá heicsi-hidreachannabaforól (HHC-P) agus teitri-hidreachannabaforól (THCP) ar fáil ar bhonn tráchtála i roinnt Ballstát den Aontas. D’ainneoin gur teoranta é an méid atá ar eolas againn faoi éifeachtaí HHC, tá ábhair imní tagtha chun solais mar thoradh ar staidéar atá déanta, lena n-áirítear roinnt tuairiscí maidir le naisc a bheith idir é agus síocóis. Idir mí an Mheithimh 2022 agus mí Feabhra 2024, thaifead Lárionad Faisnéise Tocsaineolaíochta na Seicia breis is 170 comhairliúchán maidir le HHC. Bhain go leor de na cásanna le daoine óga, lena n-áirítear leanaí a d’ith iteáin, cuir i gcás milseáin ghlóthaí. Thuairiscigh an Ungáir ráig a bhain le 30 géarnimhiú neamh-mharfacha a bhain le milseáin ghlóthaí ina raibh cannaibionóidigh leathshintéiseacha, ráig a raibh an chuma uirthi go raibh sí logánta agus teoranta do Bhúdaipeist i mí an Mheithimh 2024, do Chóras Luathrabhaidh an Aontais. Tá HHC liostaithe mar dhruga rialaithe in 22 Bhallstát den Aontas ar a laghad amhail ó mhí Feabhra 2025, agus i mí an Mhárta 2025 vótáil Coimisiún na Náisiún Aontaithe um Dhrugaí Támhshuanacha chun déileáil leis an druga faoi na rialacháin chéanna le deilte-9-THC.
Tá an cur chuige Eorpach ó thaobh beartais de i dtaca le cannabas ag éirí níos éagsúla freisin, toisc go bhfuil roinnt Ballstát den Aontas i mbun breithnithe nó athraithe a dhéanamh ar a gcur chuige beartais maidir le húsáid channabais áineasa i measc aosach, rud a chruthaíonn foirmeacha éagsúla de rochtain dhlíthiúil ar roisín cannabais agus ar tháirgí luibhe. I mí na Nollag 2021, rith Málta reachtaíocht maidir le fás teoranta sa bhaile, seilbh méideanna beaga agus úsáid cannabais in áiteanna príobháideacha, agus maidir le clubanna fáis pobail neamhbhrabúsacha. I mí Iúil 2023, rith Lucsamburg reachtaíocht chun fás teoranta sa bhaile agus úsáid in áiteanna príobháideacha a cheadú, agus i mí Feabhra 2024, rith an Ghearmáin reachtaíocht chun fás teoranta sa bhaile, seilbh agus úsáid méideanna beaga, agus clubanna fáis cannabais neamhbhrabúsacha, a cheadú. D’fhógair an tSeicia pleananna freisin le haghaidh creat dlíthiúil chun fás agus úsáid theoranta sa bhaile a cheadú. Ina theannta sin, tá tús curtha ag an Eilvéis, nach tír de chuid an Aontais í, le trialacha píolótacha córas díolacháin nó córas dáileacháin eile a údarú do chónaitheoirí sonracha i gcathracha áirithe.
Tá athbhreithniú á dhéanamh ag an Ísiltír ar a cur chuige sa réimse sin freisin. Glactar le saothrú, díol agus seilbh cannabais mar chionta coiriúla san Ísiltír fós. Mar sin féin, tá glactha le díol cainníochtaí beaga cannabais, suas le 5 ghram, le daoine os cionn 18 mbliana d’aois in ‘siopaí caife’ a chomhlíonann critéir áirithe le blianta fada anuas, agus ceann de na cuspóirí beartais a luaitear ná go mbeadh úsáideoirí cannabais á scaradh ón margadh le haghaidh substaintí eile. Cúis imní a bhaineann leis an gcur chuige sin is ea go bhfuil an cannabas fós á chur ar fáil ón margadh aindleathach, agus, dá bhrí sin, go mbaineann grúpaí coiriúla leas as an trádáil sin. Chun aghaidh a thabhairt ar an tsaincheist sin, tá triail á baint ag an Ísiltír as samhail le haghaidh slabhra soláthair dúnta cannabais i 10 mbardas, rud a chiallaíonn go bhfuil cannabas a tháirgtear in áitribh rialáilte á chur ar fáil lena dhíol i siopaí caife cannabais.
Spreag infhaighteacht dhlíthiúil agus úsáid cannabais le déanaí i roinnt Ballstát den Aontas ábhair imní maidir le sábháilteacht ar bhóithre. Roghnaigh cuid de na tíortha ina gceadaítear anois úsáid cannabais na leibhéil bhraite agus phionóis a bhí ann cheana féin a choimeád. Bhunaigh an Ghearmáin, áfach, meitheal idirdhisciplíneach chun teorainn reachtúil THC a bhunú i dtrácht ar bhóithre le haghaidh cásanna úsáide eipeasóideacha (neamhliachta), i gcomhréir le prionsabal na comhréireachta agus leis an bhfaisnéis eolaíoch reatha. Mar thoradh air sin, bunaítear anois le hAcht na Gearmáine um Thrácht ar Bhóithre uasteorainn THC de 3.5 micreagram in aghaidh an lítir i séiream fola, le riosca lagaithe inchomparáide le 0.2 gram in aghaidh an lítir de thiúchan alcóil san fhuil, mar an teorainn nach dócha go mbeidh tionchar criticiúil ar shábháilteacht ar bhóithre ar an tiománaí i gceist léi.
Tá faisnéis níos mionsonraithe faoin gcur chuige reachtach náisiúnta maidir le cannabas le fáil in Cannabis laws in Europe: questions and answers for policymaking [Dlíthe maidir le cannabais san Eoraip: ceisteanna agus freagraí maidir le ceapadh beartas] EMCDDA 2023.
Príomhshonraí agus príomhthreochtaí
Leitheadúlacht agus patrúin úsáide cannabais
- Bunaithe ar na suirbhéanna ba dhéanaí a rinneadh (Fíor 2.4), anuraidh meastar go raibh úsáid cannabais i measc dhaonra an Aontais idir 15 agus 34 bliana d’aois cothrom le 15.4 % (15.5 milliún), agus bhí dhá oiread ní ba mhó seans ann go mbeadh úsáid á tuairisciú ag fir i gcomparáid le mná. Maidir le daoine idir 15 agus 24 bliana d’aois, meastar go bhfuil cannabas úsáidte ag thart ar 18.6 % acu (8.8 milliún daoine) anuraidh, agus go bhfuil an druga sin úsáidte ag 10.1 % díobh (4.8 milliún daoine) an mhí seo caite. Meastar go bhfuil thart ar 1.5 % (4.3 milliún daoine) d'aosaigh (idir 15 agus 64 bliana d’aois) ina n-úsáideoirí laethúla cannabais, nó beagnach laethúil (is é sin, an druga a úsáid 20 lá nó níos mó ná sin le mí anuas). Maidir le daoine idir 15 agus 34 bliana d’aois, meastar gur úsáideoirí laethúla cannabais, nó beagnach laethúil, iad 2.2 % acu (2 mhilliún duine). Is fir iad thart ar thrí cheathrú d’aosaigh úsáideoirí (idir 15 agus 64 bliana d’aois), agus tá a bhformhór (52 %) faoi 35 bliana d’aois.
- Ar an leibhéal náisiúnta, is cosúil go bhfuil treochtaí éagsúla le tabhairt faoi deara maidir le húsáid cannabais. As na tíortha a chuir suirbhéanna i dtoll a chéile ó 2022 agus a thuairiscigh eatraimh mhuiníne, thuairiscigh 3 thír meastacháin ní b’airde, thuairiscigh 11 thír meastacháin chobhsaí, agus thuairiscigh tír amháin laghdú i gcomparáid leis an suirbhé inchomparáide a rinneadh roimhe sin.
- Léiríodh i suirbhé scoileanna ESPAD 2024 gur mheas daltaí scoile san Aontas idir 15 agus 16 bliana d’aois gurb é cannabas an tsubstaint aindleathach ar fusa a fháil, agus mheas thart ar aon trian de dhaltaí ESPAD (30 %) go raibh sé furasta an druga a fháil. Ba é cannabas an druga aindleathach ba choitianta a úsáideadh i ngach Ballstát den Aontas a ghlac páirt sa suirbhé. Ar an meán, tuairiscíonn 13 % de scoláirí gur bhain siad úsáid as cannabas uair amháin ar a laghad i rith a saoil. Tháinig laghdú ar an mbearna idir na hinscní i gcomparáid leis an suirbhé a rinneadh roimhe seo in 2019. In 2024, thuairiscigh 14 % de bhuachaillí agus 12 % de chailíní ar an meán go raibh úsáid cannabais ina nós na mblianta acu. I measc mhic léinn ESPAD i mBallstáit den Aontas, thuairiscigh 2.6 % acu gur úsáid siad cannabas den chéad uair nuair a bhí siad 13 bliana d’aois nó ní b’óige ná sin.
- Léirítear i dtreochtaí maidir le húsáid cannabais i measc mac léinn idir 15 agus 16 bliana d’aois laghdú foriomlán ar úsáid ar feadh an tsaoil agus ar úsáid le 30 lá anuas idir 2003 agus 2024, ó 21 % go 13 % agus ó 9.7 % go 5.7 %, faoi seach. Maidir leis an dá bheart, áfach, bhí na rátaí leitheadúlachta ab airde le tabhairt faoi deara in 2019, agus tugadh an chuid ba mhó den laghdú faoi deara ó shin i leith.
- Sa Suirbhé Líonra Eorpaigh 2024 maidir le Drugaí, suirbhé neamhionadaíoch ar dhaoine atá 18 mbliana d’aois nó níos sine a úsáideann drugaí, i measc rannpháirtithe a bhfuil cónaí orthu sna 24 Bhallstát den Aontas nó san Iorua, ba é cannabas an druga ba choitianta a úsáideadh (59 %) le 12 mhí anuas. Ar an taobh eile, bhí an cion ab ísle de phatrún tomhaltais ilsubstaintí luaite le cannabas; thuairiscigh aon trian d’úsáideoirí nár úsáid siad ach cannabas an uair ba dhéanaí a d’úsáid siad druga. Ina theannta sin, thug ní ba mhó ná 90 % d’úsáideoirí le fios gurbh é an baile an gnáthshuíomh inar úsáid siad an druga, agus thuairiscigh thart ar 80 % díobh gur úsáid siad an druga i dtoitín, i bhfoirmeacha luibhe agus roisín araon.
- Léirítear sna hualaí THC-COOH a breathnaíodh i bhfuíolluisce go raibh úsáid cannabais ag an leibhéal ab airde i gcathracha in iarthar agus i ndeisceart na hEorpa, go háirithe sa Spáinn, san Ísiltír, sa Phortaingéil agus san Iorua. In 2024, as an 51 chathair a raibh sonraí ar fáil dóibh 2023 le haghaidh 2023, thuairiscigh 13 chathair méadú bliantúil ar an meitibilít channabais THC-COOH i samplaí fuíolluisce, agus thuairiscigh 25 laghdú (Fíor 2.5).
Dul faoi chóireáil d’úsáid cannabais
- San Aontas, san Iorua agus sa Tuirc, meastar go ndeachaigh thart ar 106 000 cliant faoi shainchóireáil drugaí le haghaidh fadhbanna a bhain le húsáid cannabais (34 % de na héilimh chóireála uile) in 2023, agus chuaigh thart ar 62 000 cliant isteach faoi chóireáil den chéad uair. Ba é cannabas an príomhdhruga fadhbach ba choitianta a luaigh cliaint nua chóireála, fadhb a bhí ag 42 % de na daoine ar fad a bhí ag dul faoi chóireáil den chéad uair (Fíor 2.6).
- Is fir iad formhór na ndaoine a théann faoi chóireáil do channabais den chéad uair (81 % in 2023), ach tá méadú tagtha ar chion na mban le 5 bliana anuas, ó 16 % in 2018 go 19 % in 2023.
- Ar an meán, téann fir faoi chóireáil den chéad uair nuair a bhíonn siad 28 bliana d’aois – 12 bhliain tar éis dóibh tús a chur le cannabas a úsáid – agus téann mná faoi chóireáil nuair a bhíonn siad 26 bliana d’aois – 10 mbliana tar éis dóibh an druga a úsáid den chéad uair. Sa tréimhse ó 2018 go 2023, tháinig méadú ar an aga moille idir tionscnamh úsáide cannabais agus an chéad bhabhta cóireála; méadú 4 bliana i gcás na bhfear agus 2 bhliain i gcás na mban, agus d’fhan aois na chéad úsáide mar an gcéanna (16 bliana d’aois, ar an meán) i gcás an dá inscne.
Teacht i láthair chuig ospidéal
- I gcásanna ina bhfuil sonraí náisiúnta ar fáil, is léir go mbíonn baint ag cannabas le cion mór den teacht i láthair chuig seomra éigeandála de dheasca drugaí seirbhísí ospidéil i roinnt Ballstát den Aontas. Sa Spáinn, bhí baint ag cannabas le 46 % de na cásanna (2 862 as 6 627) a tuairiscíodh i staidéar rialta a rinneadh thar sheachtain amháin in 2022 in 16 den 19 bpobal féinrialaitheacha. Sa Ghearmáin, bhí baint ag cannabas le 9 % de na cásanna (os cionn 1 600 as 17 900) de ghéarmheisce agus de ghéarnimhiú mar gheall ar dhrugaí aindleathacha a tháinig i láthair chuig ospidéil in 2022.
- Thuairiscigh 20 duine cannabas as 22 sheomra éigeandála ospidéil Euro-DEN Plus i mBallstáit den Aontas agus san Iorua in 2023. Tar éis cócaoin, ba é cannabas an dara substaint ba mhinice a thuairiscigh líonra ospidéil Euro-DEN Plus in 2023. Ba é 21 % an cion airmheánach de chásanna a bhain le cannabas i measc na n-ospidéal a thuairiscigh. Níor tuairiscíodh aon fhaisnéis maidir leis an gcineál cannabais a úsáideadh, ná maidir leis an mbealach riartha. De ghnáth, tuairiscíodh cannabas nuair a bhí substaintí eile i láthair freisin, rud lena léirítear go raibh go leor daoine a bhí ag déileáil le tocsaineacht drugaí i mbun úsáid ilsubstaintí.
- Tháinig méadú ar líon na gcásanna a bhain le cannabas i seomraí éigeandála in 12 den 20 ospidéal Euro-DEN a thuairiscigh cásanna ina raibh baint ag cannabas. Tháinig laghdú ar an líon i gcúig ospidéal, bhí an líon cobhsaí in dhá ospidéal agus níorbh fhéidir an líon a chur i gcomparáid le sonraí a bhí ar fáil roimhe sin in ospidéal amháin, a thosaigh ar thuairisciú in 2023.
Sonraí maidir leis an margadh cannabais
- In 2023, thuairiscigh Ballstáit den Aontas 259 000 urghabháil de roisín cannabais a bhí cothrom le 551 thona (468 dtona in 2022) agus 219 000 urghabháil channabais luibhe a bhí cothrom le 201 thona (265 thona in 2022) (féach Fíor 2.7). Tar éis laghdú 43 % in 2022, tháinig méadú beag ar chainníocht fhoriomlán an roisín cannabais a urghabhadh san Aontas in 2023, ach bhí an chainníocht sin fós i bhfad faoi bhun na 817 dtona a urghabhadh in 2021. Mar a tharla sna blianta roimhe seo, ba í an Spáinn í an tír a thuairiscigh gur urghabh sí an méid ba mhó roisín cannabais san Eoraip go mór fada (375 thona). Ina theannta sin, in 2023, thuairiscigh an Tuirc 12 800 urghabháil de roisín cannabais, a bhí cothrom le beagnach 28 dtona, agus 68 777 n‑urghabháil de channabas luibhe, a bhí cothrom le 71.5 tona.
- Tuairiscíodh thart ar 615 000 cion úsáide nó seilbhe cannabais san Aontas in 2023 (609 000 in 2022), mar aon le 100 000 cion soláthair (98 000 in 2022).
- In 2023, ba é 23 % an meánchion de THC i roisín cannabais san Aontas, a bhí cothrom le ní ba mhó ná dhá oiread an méid a bhí le fáil i gcannabas luibhe, a bhí cothrom le 11 %. Is léir ó threochtaí innéacsaithe gur mhéadaigh meánchion THC roisín beagnach faoi dhó idir 2013 agus 2023, ach go raibh an meánchion THC i gcannabas luibhe fós cobhsaí ar an mórgóir. Ba chóir a thabhairt faoi deara go bhféadfadh éagsúlacht mhór a bheith i gceist le cion THC na samplaí leibhéil miondíola de roisín cannabais agus de channabas luibhe araon.
- Is féidir faisnéis mhionsonraithe bhreise maidir le cannabas a fháil in Margadh Drugaí an Aontais Eorpaigh: Cannabas – Grinnanailís de chuid EUDA agus Europol, agus Cannabas: freagairtí sláinte agus sóisialta de chuid EUDA.
Sonraí foinseacha
Tá an tacar iomlán de shonraí foinseacha don Tuarascáil Eorpach um Dhrugaí 2025, lena n-áirítear meiteashonraí agus nótaí modheolaíocha, ar fáil inár gcatalóg sonraí.
Is féidir teacht ar fhothacar de na sonraí sin thíos, a úsáidtear chun grafaicí eolais, cairteacha agus gnéithe comhchosúla a ghiniúint ar an leathanach seo.
Táblaí sonraí maidir le leitheadúlacht úsáide drugaí lena n-áirítear suirbhéanna ar an bpobal i gcoitinne agus anailís ar fhuíolluisce (gach substaint)
Táblaí sonraí eile lena n-áirítear táblaí a bhaineann go sonrach le cannabas
